شعر منیم اۆچون بیر کایناتدیر
شعر منیم اۆچون بیر کایناتدیر،
اونون اولدوزلاری،
گۆنشلری وار.
شعر منیم اۆچون سیرلی حیاتدیر،
اونون اؤز سئوینجی،
اؤز کدری وار،
شعر ده یاشاییر اؤز باهارییلا،
اونا یول دا وئریر سونسوز آسیمان.
او کئچیر طبیعی آددیملارییلا،
صۆنعی پئیکلرین آشدیغی یولدان.
کئچیر آددیم-آددیم
کنددن، شهردن،
اولدوزلار اۆستونون ناخیشی کیمی.
او کئچیر باشینا یاغسا دا هردن،
تنقیدلر مِتئور یاغیشی کیمی.
سؤزوم ده گۆجونو
ائللردن آلیب،
قوی اوچسون گؤیلره،
او، بیرنفسه.
قالین قاتلارداکی یانان پئیک اولوب،
نه غم،
نئچه شعریم گئری دؤنمهسه.
نه قدر قول-قاناد،
آچسا دا ایلهام،
من آنا تورپاغین سینهسیندهیم.
نه قدر گؤیلره اوچسا دا ایلهام،
من یئرین جاذیبه قۆّهسیندهیم.
یئنه دۆشونجهلر آپاریر منی،
دئییرم: سوسمارام بوران-قار اولسون.
گزیرم سئودیگیم آنا وطنی،
میصراعلار گزیرم،
میصراعلار اولسون.
شعره وورولدوغوم، دئ، آیمی، ایلمی؟
قلبیم آرزولاردا، دیلکلردهدیر.
ان بؤیوک کاینات صنعت دئییلمی،
صنعت کایناتی اۆرکلردهدیر.
هر کس خوشبخت اولار اؤز دیاریندا،
عزیزدیر ازلدن اؤز یئریم دئدیم.
کاش خالق اۆرگینین فضالاریندا،
دۆنیالار دولاشا بیر شعریم دئدیم.
باخیرام گؤیلره قلبیمده شعر،
اولدوزلار اوزاقدان گؤز وورور منه.
کاینات سیرّینی آچسا دا بیر-بیر،
صنعت کایناتی سیرلیدیر یئنه.
بلی، شعر منه بیر کایناتدیر،
سؤزلو، سوراقلیدیر
بیر کیتاب کیمی.
بلی، شعر منه سیرلی حیاتدیر،
آچسام دا،
باغلیدیر بیر کیتاب کیمی.
۱۹۹۲