هارداسان، آزیخ ماغاراسی

نولدو، گؤی تیتردی،
یئر کؤلگه‌لندی؟
مرمر قایالاری
منه گؤسترین
آزیخ ماغاراسی!
هارداسان ایندی؟
سنین قوجاغینا
دؤنمک ایسترم!

— آجمیسان!
پایینی اوغول گؤتور، آل!
هر کسین برابر
اؤز پایی واردی.
تاغلارین آلتیندا
یانار گور تونقا!
چؤرگه بۆکولموش
نور پایلایاردی!

اۆرکلر مهریبان،
اۆزلر صمیمی.
پلنگ دری‌سی ده
اَیینلرینده.
کؤلگه‌لر داغ بویدا
هئیکللر کیمی -
ماغارا اونلارین
چیینلرینده.

هامی دؤیوشردی
یاغی گلنده،
آروادلی، اوشاقلی،
اوغوللو، قؽزلی.
ایلان-چیانلار دا
سۆرونوب اؤنده -
دۆشمنی ووراردی،
دوستو وورمازدی!

بو گۆن آلوو یاغیر
یای گۆندوزوندن،
صاباحکی قؽش بلکه
اؤلوم قؽشیدیر؟
سیویل دئدیکلری
دۆنیا اۆزوندن،
بیر دوغما ماغارا
داها یاخشیدیر!

ائله اینسان وار کی،
بو گۆن جاهاندا،
اوندان مهریباندیر
ایلان-چیان دا.

اۆرکلر نه داردیر،
سمالار گئنیش،
تانری، ماغارا دا
اسیر دۆشرمیش!

نولدو، گؤی تیتردی
یئر کؤلگه‌لندی؟
دوغما قایالاری
منه گؤسترین!
آزیخ ماغاراسی،
هارداسان ایندی؟
ایستی قوجاغینا
دؤنمک ایسترم!

سن منه عزیزسن،
منه محرمسن،
دۆنیایا آچیلان
نور پنجره‌مسن!

29 آوقوست — 5 سئنتیابر ۱۹۹۹