ائویمین بیر کۆنجو،
اوشاقلاردان قاچا-قاچا
تاپمیشام بو یئری.
بورا شعرلریمین
دؤیوش سنگری.
اییلیب ماساما،
عقلیمی، حسّیمی
وئریرم یازیما.
منیمله اؤپوشه-اؤپوشه
اؤلور سیقارئتلر،
یایین بۆرکوسو،
پاییزین بؤلگوسو،
قؽشین آیازی،
یازین دادی
هامیسی یازیمدادی.
آنلاریم، ساعتلاریم
کدریم، شۆبهم، عنادلاریم،
غیبتلرده سؽندیریلان
قانادلاریم
هامیسی یازیمدادی...
خسته یازیلاریم اولور،
ائله ورقدهجه اؤلور.
اؤلن شعریمین تابوتونا دؤنور
یازی ماسام.
تزه یازیرام،
اؤ-له-رم،
اؤلرم، یازماسام!!!