بایاق نغمه ایدی سولارین سسی،
ایندی هر دالغادان بیر قورخو باخیر.
دنیزین ائله بیل دونوب نفسی،
دنیزه سویوموش اولدوزلار آخیر...
گۆن باتدی،
قورخولو بیر گئجه دۆشدو،
بیلمهدیک بو گئجه هئچ نئجه دۆشدو.
بلکه ده یئرسیزدیر
بو عیناد، غۆرور،
قارشیدا داغ کیمی دالغالار دورور.
بو نیمداش قاییقلا،
کؤهنه آوارلا
دلی دالغالاری یؽخماق چتیندیر.
قاچیب گلدیگیمیز بو آرزولارلا
دئیهسن، ساحیله چؽخماق چتیندیر.
بیز ایندی دنیزه آتیلمیش بیر داش،
یئنه ده دئمیرم اۆمید اۆزولوب.
شهلا گؤزلرینده گیلهلنیب یاش،
تیترک دوداقلارین گؤمگؤی کسیلیب،
بیر باخ،
ساحیلهدک دولودور دنیز،
گؤز یاشین دنیزی داشیرا بیلر.
دئییرسن دالغادان اۆمید گؤزلهمه،
دالغالار قاییغی آشیرا بیلر...
یامانجا اوینادیق بو اودلا، سویلا،
بو گیزلی اویونا عادتیمیز یوخ.
ساحیله اوزانان آی جؽغیرییلا
پیادا گئتمگه طاقتیمیز یوخ...
اۆمیده اینانیب یاشاماق آسان،
اوزاق ایشیقلارا باخماق چتیندیر.
سؽغینیب کؤکسومه پؽچیلداییرسان:
- دئیهسن ساحیله چؽخماق چتیندیر...
ساچلارین نملیدیر بو گئجه کیمی،
من سنی دنیزدن اوغورلامیشام.
یوموب گؤزلرینی
سای اۆچه کیمی
ساحیله چؽخاریق...
بو ناغیللارا
اینانا-اینانا اوشاق اولموشام...
بیر قؽزیلبالیقسان مؤعجوزه دولو
من سنی ساحیله آپاریم نئجه؟
بو دنیز غضبلی،
من دلی-دولو
چتین کی، اییلم،
چتین کی، سؽنام،
بیر آزجا اۆمید وئر، بیر آزجا اینام
توتوب دالغالارین آغ ساچلاریندان
دنیزی ساحیله چکیم ایندیجه...
گۆلمه،
سئونلره هر شئی مۆمکوندور.
بو دا بیر عؤموردور،
بودا بیر گۆندور...
ساحیل قوملارینا توخوندو قاییق،
بیر آچ گؤزلرینی اطرافینا باخ.
تومریس تک بیر آنام بیلیردیم سنی
آی دلی، سن هله اوشاقسان، اوشاق.
بو دنیز،
بو قاییق،
بو کؤهنه آوار،
بو ساحیل،
بو دۆنیا،
داها هر نه وار
سنیندیر،
منیمدیر،
سعادتیندیر،
اینانا بیلمیرسن بو سعادته
دئییرسن:
ساحیله چؽخماق چتیندیر...