وطن

آنالارین تورپاغی سولایان
ترینی سئودیم،
گؤی قورشاغی کیمی الوان
یئرینی سئودیم؛
آجینی، شیرینی سئچه بیلمه‌دیم،
آرازدان ایچه بیلمه‌دیم،
کؤرپوسوندن کئچه بیلمه‌دیم،
دلی کیمی وورولدوم،
دلی کۆرونو سئودیم، وطن!

بورنو تیتره‌ین دووشانینی،
بنؤوشه‌نی، یووشانینی،
قوروقدا مه‌له‌ین جئیرانینی،
سۆنبولونو، رئیحانینی،
باهار مۆژده‌لی قارانقوشونو،
آنالارین «داشا دؤنه‌سن!» - دئییب
هئیکل آرزولایان قارغیشینی؛
قوروجا داشینی،
تورپاغی‌نین هر قاریشینی،
ائوین-ائشیگینی،
سوبا یانیندا خومارلانان پیشیگینی،
قفسده‌کی شیرینی سئودیم، وطن!
گؤزلیندن، گؤیچگیندن
بیرینه کؤنول وئردیم،
بیرینی سئودیم، وطن!
چیچگینی، گۆلونو سئودیم، وطن!

اوبانی، ائلینی سئودیم، وطن!
یاغیشینا چتیر توتمادیم،
لئیسانینی، سئلینی سئودیم، وطن!
دنیزینده اۆزه بیلمه‌دیم،
وورولدوم ماوی‌لیگینه،
چایلارینی، گؤلونو سئودیم، وطن!
مئشه‌لرین فیکریم کیمی قاریشیق،
زیروه‌لره گئدن جؽغیرلارین دولاشیق،
اۆتولو دۆزلرینی،
قؽرچین چؤلونو سئودیم، وطن!
دۆشمنینه «یان» - دئین،
دوستلارینا «جان» - دئین
«آنام آذربایجان» - دئین
دیلینی سئودیم، وطن!...