شمع

فۆضولی‌نین خاطیره‌سینه

یۆز ایللردی بیر شمع یانیر،
کۆلکلر سؤندوره بیلمیر،
یۆزلرله اللر اوزانیر،
ایشیغینی دره بیلمیر.

قارانلیقسا سولو-ساغی،
یانان شمعین نه گۆناهی؟!
اریییر، تؤکولور یاغی،
اؤلور، اؤلور، اؤله بیلمیر.

گیله-گیله، داملا-داملا
گۆن‌به‌گون اۆزولن جانلا،
آغلاییر هر آغلایانلا،
هر گۆلنله گۆله بیلمیر.

قؽزیندیریر یازیقلاری،
قورخوزور یالقوزاقلاری،
ایشیقلادیر اوزاقلاری
اؤز دیبینی گؤره بیلمیر...