قارا-قارا قاریشقالار

قارا-قارا قاریشقالار
کپه‌نگی نئیله‌دینیز
توپلاشدینیز توپ اولدونوز
قاناد قاناد قوپاردینیز
داشیدینیز آپاردینیز
کپه‌نگی نئیله‌دینیز؟

…آیریلدی گۆن ایشیغیندان
سؽیریلدی گؤی قورشاغیندان
قولاغیم باتدی توتولدو
گۆللرین قؽشقیریغیندان
کپه‌نگی نئیله‌دینیز؟

دردی دۆشر آغیزلارا
هارایلار چاغیرار سیزی
نه یئدیرر دویوزدورار
نه قؽشدان چؽخارار سیزی
کپه‌نگی نئیله‌دینیز ؟