حسن یار ازل اولموشدو چو سندن ظاهر

سندن ای کعبۀ عشاق، صفا گؤرموش ایدیم،
اهل عشقی سر کویینده فدا گؤرموش ایدیم.
کعبۀ کویین ایدی سجدگه اهل صفا،
تاق ابرولروی قیبله نما گؤرموش ایدیم.
کیمه سن قهرایله دوشنام وئریدین، ای شوخ،
عوضینده سنه من خیر دعا گؤرموش ایدیم.
مانیم اول حسن جاهان سوز کی، معشوقوم دور،
سندن، ای دلبر خورشیدلیقا، گؤرموش ایدیم.
چین زلفونده کی، بند ایدی دل پرخونوم،
نکهت ایله اونو من مشک ختا گؤرموش ایدیم.
مظهر اولمادی یوزون پرتو شمس ازه له،
من سنی مظهر انوار خدا گؤرموش ایدیم.
حسن یار ازل اولموشدو چو سندن ظاهر،
سیّدین عشقینی اول حسنه روا گؤرموش ایدیم.