او بزمی بیرده، سیّد، گؤرمک اولماز، آغلارام هر گون

کئچن شب بیر مکاندا بیر نگار ساده گؤردوم من،
خدنگ غمزه سین جان آلماغا آماده گؤردوم من.
ییغیلمیشدی او بزم جانفزایه حور و قیلمانلار،
بهشت عدن کیم دئرلر، اونو دنیاده گؤردوم من.
خدنگ غمزه سیندن، اونلارین تیر نگاریندان
اؤزوم تک اهل بزمی سربسر اوفتاده گؤردوم من.
ییخیلدیم، هوش دن گئتدیم، توتولدو نطق، موسی تک
تجّلا نورونو چون وادیی سیناده گؤردوم من.
مسلمان زاده ایدیم، دؤندوم آخر بت پرست اولدوم،
محمد نورونو چون اول بت زیباده گؤردوم من.
او بزمی بیرده، سیّد، گؤرمک اولماز، آغلارام هر گون،
کی گویا اول بساطی دون گئجه رؤیاده گؤردوم من.