حاجی عمر بئی شیروانی یه

حاجی عمر بئی شیروانی یه

اولوب رنجیده خاطر کی کؤنلوم بیر نفر بئی دن،
هراس ائیلر ایلان ورموش اؤکوز تک ایندی هر بئی دن.
مزاقیمدا بئتردیر خاصیتده زهر قاتل دن،
اگر بیمار کؤنلوم حاصل ائتسه گول شکر بئی دن.
ائشیتمیشکی، بئی لر همتیندن شر دؤنر خیره،
بشردن نیشام نفرت کی، خیریم اولدو شر بئی دن.
دخی بئی لر بساطین گؤرمه یه هرگز گؤزوم یوخدور،
اگر خیریم اولا هر گونده دنیالار قدر بئی دن.
تقرب ائیله‌دیم هر بئی له، من بدبختلیک گؤردوم،
خوشا اول شخص لر کیم، اولدو اونلار بختور بئی دن!
منیم خود دانه امید ایله آخر شهپریم سیندی،
اگرچی باغلاییب دنیاده چوخلار بال و پر بئی دن.
درخت بیددن ائتمک ثمر امیدی آسان دیر،
ولی مشکلدو خیلی توتماق اومید ثمر بئی دن.
شکایت ائیله ییردیم دون گئجه یوز آه و زارایله،
چکیردیم رشتۀ نظمه کی، چکمیشدیم نه‌لر بئی دن.
زبان رند آچیب بیر یار دانا دل کی، ای سیّد،
قیاس ائتمه تماماً بئی لری سن بیر نفر بئی دن.
توتاق کی، بئی لرین واردیر زیانی غیر کسلرچون،
توقع اهلی سن سن، شاعره اولماز ضرر بئی دن.
گؤزوندن گلسین اول انعام و احسانلار، او نعمت لر
کی، آلدین گاه بوغدا، گاه پول، گاه آت و خر بئی دن.
بئله بدخرج لیک کیم، سنده وار تاب ائیله مز دریا،
اگر مدن اولا، جانیم، قوتاریر سیم و زور بئی دن.
گرک دیر سندن ائتسین الحذر بئی لر عجب دیر بو،
اوتانمازسان کی، بس سن ائیله ییرسن الحذر بئی دن؟
یادیندان چیخدی یوخسا اول بورونج تازه و بی رنج،
گلیردی خطۀ شیروانه یوک – یوک هر سفر بئی دن.
بو نه کفران نعمت دیر، بو نه آثار بدعت دیر،
قیلیرسان نه شکایت دیر بو اول صاحب هنر بئی دن؟
هانی اوندان سوا، انصاف قیل، بیر بئی کی، توتسون ال،
مگر مقصود اولور حاصل جاهان ملکونده هر بئی دن؟
بو ایل بس هانی بوغدان، هانسی بئی دن خیره چاتدین سن،
مرادین حاصل اولدو سؤیله هانسی تاج سر بئی دن؟
فلان بئی دن نه اولدو حاصلین، یا اینکی بئهماندان،
بو ایل نفعین ندیر، گل واضح ائیله مختصر بئی دن.
دئدیم ای دوست، خاموش اول کی، بو تقصیر سندن دیر،
تمنا ائتدیگیم یوخدور بو ایل بیر ماحذر بئی دن.
تمنا ائیله سم هر شئی کی، اول دنیاده ممکن دور،
توقف سوز اولور حاصل بو گون حاجی عمر بئی دن.
مرادیم اولسا بوغدا بوغدا تک چاک ائتمنم سینه،
توقع ائیلرم حاجی عمر بئی کیمی نر بئی دن.
ندیر بوغدا کی، اوندان اؤتریی آدم تک اولام غمگین،
اولور حاصل تمنا ائیله سم لعل و گوهر بئی دن.
هوای غیرایله هر لعل تک قان ائیله‌مه باغرین،
طلب قیل رنگ کارین، ای دل، اول خورشید فر بئی دن.
الا، ای ثانی فاروق، الا ای مدلت کانی،
عمر قیلسین فخارت سن کیمی صاحب ظفر بئی دن.
قیلینجین کسکین اولسون ذوالفقار پاک حیدر تک،
سنی خلاق عالم ائیله سین ممتاز هر بئی دن.
بو ایل بیر مرحمت قیل سیّدین حقینده، ای سرور،
دئسینلرکیم، اولوبدور، شکرلله، بختور بئی دن.