عرب و ناقه
بیر عربین اون دوه سی وار ایدی. بیرینه سوار اولوب دوققوزون قاباغینا سالیب گئدیردی. دوهلرین سایدی گؤردو کی، دوققوزدور. اما سوار اولدیغون سایمادی. دئدی کی، بس دوه نین بیرین ایتیرمیشم. آشاغی دوشوب هر طرفی آختاردی. بیر اثر گؤرمهییب مراجعت قیلدی گؤردو کی، دوه سی اوندور. یئنه سوار اولدی. بیر قدر یول گئدندن سونرا دوهلرین سایدی، یئنه گؤردو کی، دوققوزدور. یئنه آشاغی دوشوب هر طرفی آختاردی. بیر اثر موجود اولمادی. معاودت قیلدی، گؤردو کی، دوه یئنه اوندور. دئدی کی، بس من سوار اولاندا دوه نین بیری نابود اولور؛ یاخشی بودور کی، پیادا یول گئدیم، تا کی دوه ایتمه سین.