نادیره

نادیره

جوها اکثر اوقات تحصیل معیشت دالینجا گئتمزدی. بیر گون عورتی اونا دئدی کی، هرگاه بوندان سونرا هر گون صبح ائودن دیشاری چیخماسان، آخشاما کیمی ایگیرمی قوروش پول گتیرمه سن، سنی ائوه قویمایاجاغام. بو شرط ایله اونی ائودن چیخارتدی. جوها او گون آخشاماجان گزدی، دولاندی، الینه بیر شئی گلمه دی.
شهرین کناریندا بیر خارابا وار ایدی، اؤزونی اونا یئتیردی. بیر گوشه ده مخفی اولدی، قرار توتدو، دریای فکره غوطه ور اولدی. بو اثناده گؤردو کی، بیر درویش همین خارابایا داخل اولدی، بیر طرفده ایلشدی. بیر آز واخت دان سونرا درویش داغارینی چیخارتدی. بیر چراغ یاندیردی و داغاردان بیر قدر موم چیخارتدی. او مومدان بیر شکیل ترتیب ائله دی، قاباغینا قویدو، دئدی کی، بو آدم دیر. اونا خطاب ائله‌دی کی، ای آدم، خداوند احدیت سنی یاراتدی و جنّتده سنه منزل وئردی، انواع و اقسام سنه نعمت لر وئردی. بوغ دانی یئمک دن سنی نهی ائله دی. مخالفت ائله دین، بوغ دانی یئدین. سنی بهشتدن چیخاریب دنیایا سالدیلار و بیز ده سنین سولبوندن وجودا گلدیک. نه قدر کی، ساغیق، گرک اَلّدوام تحصیل معاش ایچون مشقت لر چکه ک؛ ائله کی، وفات ائلدیک، اؤز عصیانیمیزین بابتیندن عذابدا اولاق.
بس درویش عصانی گؤتوروب، اونی عصا ایله دؤیدو و سیندیردی. یئنه مومدان بیر صورت ترتیب ائله دی. اونون آدینی حوا قویدو، دئدی کی، یا حوا، نه سبب سن نعیم بهشتدن گؤز یومدون و آدمی بوغدا یئمه یه تحریص (راغب، آزمند) و ترغیب ائله دین، تا کی بوغ دانی یئدی؟
اونودا عصا ایله سیندیردی. و یئنه بیر صورت ترتیب ائله دی، اونون آدینی شیطان قویدو، دئدی کی، ای ملعون، سن ملایکئی مقرب جمله سیندن ایدین. اؤز حدیندن تجاوز ائله دین و آدمه سجده ائله مه دین، تا کی سنی اسفل الصافیلینه آتدیلار. دوباره حوایا وسوسه وئردین، اونی بوغ دانی یئمه یه وادار ائله دین و اونون اولادیندان داخی ال چکمیرسن، همیشه اونلاری یولدان چیخاردیرسان، اغوا ائدیرسن. بس عصانی اونون باشنا ووردو، اونی دا سیندیردی. و هابئله، مومدان یئنه صورت لر ترتیب ائله دی، هر بیری نین آدینی [بیر] پیغمبر قویدو و اولیا قویدو، هر بیرینه بیر تقصیر قرار وئردی، اونلاری دا سیندیردی.
تا اینکی نوبت آخردا بیر صورت ترتیب ائله دی، اونون آدینی رب اعلا قویدو. بیر نئچه تقصیرلر داخی اونا ثابت ائله دی، عتاب و خطاب قیلدی. چون ایسته‌دی عصانی اونون باشنا ائندیرسین، جوها یئریندن قالخدی، دئدی کی، ای درویش، بیر ساعت صبر ائله کی، من ایگیرمی قوروشومو اوندان آلیم. اگر آللاهی دا اؤلدورسن، گرک منیم ایگیرمی قوروشومو اؤزون وئره سن. اوندان اؤترو کی، اگر پولو آلمامیش ائوه گئتسم، عورت منی ائوه قویمایاجاق.
درویش جوهانین صوتوندن وحشت ائدیب، قورخدان هر نه کی واری ایدی، خارابادا قویوب قاچدی.
جوها یئریندن قالخیب، درویشین شئی لرینی گؤتوروب ائوه گلدی. او جمله دن یوز قزیل پول او شئی لرین ایچینده وار ایدی. قاپینی دؤیدو، عورتی قاپی نین دالینا گلدی، دئدی کی، هرگاه ایگیرمی قوروشو گتیرمیسن، قاپینی آچاجاغام و الا یوخ.
جوها دئدی کی، قاپینی آچ. ایگیرمی قوروشون عوضینده یوز قزیل گتیرمیشم.
عورت قاپینی آچدی، گؤردو کی، دوغرو دئییر. اوندان احوال پرسان اولدی کی، نئجه اولدی کی، بو قیزیللاری اله گتیردین؟
دئدی کی، او سبب کی، آللاهی اؤلومدن قورتاردیم، بو نعمتی منه قسمت ائله دی. و کیفیتی بیان ائله دی.