منو
لطیفه
لطیفه
بیر گون شاماخیدا بیر نفر شخص بعد از ظهر وفات ائله‌میشدی. قبرستانا آدام گؤندردی لر کی، قبیر قازسین. گورکن قبری قازدی. میت صاحب لری مصلحت گؤرمه‌دی لر کی، دار ایکیندی واختی خالقا زحمت وئرسین لر. او گئجه مییتی ائوده ساخلادیلار کی، سحر دفن ائله سین لر.
خالق دئدی کی، قبرین آغزی آچیق قالماق یاخشی دئیل دیر، شهره وبا ناخوش لوغو دوشر، گرک دیر کی، هامان قازیلمیش قبیرده بیر نفر آدام بو گئجه یاتسین، صاباح میتی دفن ائدریک.
قضارا، بیر نفر چوبان قبرستان کناریندا قویونلارین اوتلادیردی، چوبانا اون مانات پول وئریب راضی ائله‌دی لر کی، چوبان بو گئجه هامان قبرین ایچینده اوزانیب یاتسین. چوبان او گئجه قبیرده یاتمیشدی. یانیندا بیر بؤیوک
دیه نه یی وار ایدی. شهرده ایکی نفر لوطی دئدی لر کی، ائله بو چوبان اون ماناتی یئسین گئتسین؟ بو گئجه بیریمیز منکر و بیریمیز نکیر صورتینده گئدیب چوباندان اون ماناتی آللیق.
بس هر بیری بیر آغ کفن تاخیب، آغاجین باشنا اسکی و نفتله لوپا قاییریب گلدی لر چوبانین اوستونه. چوبان نه منکر بیلیردی، نه نکیردن خبری وار ایدی. گلدی لر چوبانا دئدی لر کی، “مِنْ رَبُکَ”؟*
چوبان دئدی کی، من اؤلمه‌میشم، من بیر نفر دیری چوبانام. منه اون مانات پول وئریب لر کی، من بو گئجه لیک بو قبیرده یاتام. هله اؤلن صاباح گله جک، گئدین صاباح گلین.
لوطولار الینده اولان لوپالارین سیلکه له‌ییب چوبانی وردولار، دئدی لر: “مِنْ رَبُکَ ؟”
چوبان چوخ یالواردی کی، من اؤلمه‌میشم، قولاق آسماییب چوبانی لوپا ایله ووردولار.
چوبان قبیردن قالخیب منکرین کلّه سیندن بیر دینک ووردو، درحال مغز سری تؤکولوب، هلاک اولدی.
او بیری یولداشی اوز قویدو شهره قاچماغا. چوبان اونی قوا – قوا سالدی شهره. میت اولان ائوین یانیندا بیر خارابا هامام وار ایدی، لوطی قاچیب گیزلندی اول خارابا اولان هامامدا. چوبان فریاد ائله‌دی کی، آی جامات، بیر چراغ گتیرین. چوبانین صداسینا خالق جمع اولدیلار. گؤردولر هامان چوبان دیر کی، اون مانات آلیب قبیرده یاتمیشدی.
دئدی لر کی، ای چوبان، نه وار؟
دئدی کی، منکرله نکیر سهو ائدیب، منی اؤلن بیلیب، قبرستانا گلیب مندن بیر پارا سؤزلر خبر آلیرلاردی. دئدیم کی، من اؤلمه‌میشم، میت هله صاباح گله جک. قانمادیلار، اللرینده اولان گرز آتشین ایله منی وردولار. من قبیردن قالخیب منکرین کلّه سیندن بیر دینک ورموشام، بئینی داغیلیب، اؤلوبدور. اما نکیر زرب شستیمی گؤروب قاچدی. اونی قوا – قوا سالمیشام بو خارابایا. الله خاطرینه بیر چراغ گتیرین، اگر اونی دا اؤلدورسم، داخی قبیرده اولانلاریمیز راحت یاتارلار، منکر و نکیرین شرلریندن سالامات اولارلار.
بونلار دئدی لر کی، یقین چوبانی واهیمه باسیب دیر. چوبانی بیر دیلیله یولا سالدیلار. صاباح قبرستانا گلنده گؤردولر بیر نفر لوطونون کلّه سی داغیلیب دیر. تانیدیلار. یولداشین داخی بیلدی لر کی، کیم ایمیش و نه اوچون قبرستانا گئدیبلرمیش، – هامییا معلوم اولدی.
——————-
* آللاهین کیم دیر؟