وفالی قالیب

یئنه کؤنلوم قوشو خیالا دالیب،
باشیمین اۆستونو دومانلار آلیب.

یاری یولدا آراز کسیب یولومو،
منی مین درده، مین بلایا سالیب.

سئوگیلیمدن اوزاق دۆشوب کؤنلوم،
بیلسین عالم، قانیم یامان قارالیب.

گئجه‌لر یاتمیرام صاباحا قدر،
منی عقرب‌می، یا ایلان‌می چالیب!

قان چکیب یول چکن گؤزوم، هئیهات،
اوزون ایللر اؤتوب، یاشیم چوخالیب.

خئیلی وار کی، وۆصال کۆسوب مندن،
منه بیر آیریلیق وفالی قالیب.