یاشا باخمیرام...

یاش منی حاقلاییب، دئییر کی، دایان،
یوخ، یوخ، من بو یولدا یاشا باخمیرام!
بو یول تبریزیمه آپاریر منی،
بو یولدا کسگه-داشا باخمیرام.

دئییرم، ای وۆصال، هارداسان، هاردا؟
گئدیرم، گئدیرم، قالسام دا داردا.
دیل‌بیلمز توفاندا، بوراندا قاردا
گئری‌یه دؤن دئین قؽشا باخمیرام.

یولدایام، یولدایام، یولدایام یئنه،
قوی اؤیود وئرمه‌سین قانسیزلار منه.
اؤنونه چؽخسا دا مین قانلی صحنه،
گؤزلریمی توتان یاشا باخمیرام.

عهدیمه وفالی بیر اینسانام من،
دوغما قارداشیمدان نیگارانام من،
اوزون یوللار یوران سلیمانام من،
قار کیمی آغاران باشا باخمیرام.