چوخ زاماندیر، یارین حسرتیندهیم
چوخ زاماندیر، یارین حسرتیندهیم،
گلهیدی، بیر اونو باری گؤرهیدیم،
بۆلبول تک فریادیم چؽخدی فلکه،
جنّت ایلی گۆلعوذاری گؤرهیدیم.
باسایدی اۆزومه گۆل آیاغینی،
اؤپهیدیم اۆزونو، هم دوداغینی،
گاه آچایدیم آغ سینهنین باغینی،
قوینونداکی قوشا ناری گؤرهیدیم.
گاه آلایدیم گردنینی قوجاغا،
گاه اۆزوم سۆرتهیدیم زۆلفه، بوخاغا،
گاه دا اوتورایدیم قاباق-قاباغا،
دانیشایدی، خوش گؤفتاری گؤرهیدیم.
بیلیرمولا باغریمداکی یارانی،
نئجه یاخمیش من تک گۆنو قارانی،
یار مندن کسمزدی بئله آرانی،
بو قویمایان کیمدیر، باری، گؤرهیدیم.
واقیفم، هیجراندیر منیم محشریم،
گئجه-گۆندوز جانان اولموش ازبریم،
کرم ائیلهییبن گلسه دیلبریم،
کسیلیرمی آه و زاری گؤرهیدیم؟