سلطنت تختی نین اوّل پایه سی زندان اولور

غنچه باغری دهر بیدادیله اوّل قان اولور،
سونرا یوز لطف ایله کؤنلو آچیلیر، خندان اولور.
قطرۀ باران کی، بیر مدت صدف حبسین چکر،
یوخ ایکن قدری، تاپیب قیمت دُرّ غلطان اولور.
دانه توپراق ایچره شدت چکدیگیچون نئچه گون
باش چکیب خرمن لنیر، آرایش بوستان اولور.
قهردن اکراه ائدن لر لطفه اولماز مستحق،
مستعد درد اولانلار قابل درمان اولور.
محنته صبر ائیله ین راحت تاپار، چون یوسفه
سلطنت تختی نین اوّل پایه سی زندان اولور.
گر رضا اولسا قضایه، مشکل اولماز هیچ حال،
عارفه، صبرایله، هر مشکل کی وار، آسان اولور.
فعل دیر اصل رضای حق نه کیم، اصل و نسب،
خاک فرمانبر بشر، عاصی ملک شیطان اولور.
سایر مخلوقدان بیر کیمسه اولسا پاک دل،
اهل بیتین فرقه سیندن ساییلیر، سلمان اولور.
خواه سیّد، خواه عامی کام تاپماز بی ادب،
فعلی مستحسن اولان، مستوجب احسان اولور.
یوز مشقت چکسه، کام دل تاپار انجام کار،
هر کیمین عالمده مولاسی شه مردان اولور.
تیره اولماز راسترو گر چکسه بند آهنین،
راسترو تیر و خدنگین زیوری پیکان اولور.
تابع فرمان ائدر حکمونه جمله عالمی،
مرتضی حکمونه هر کیم تابع فرمان اولور.
اول شهنشه کیم، اگر بیر مورا قیلسا التفات،
مور حکم ائیلر سلیمان اوستونه، سلطان اولور.
اول امام دین و دنیا کیم، اونون دشمنلیگی
مشریکین دینینه و دنیاسینا نقصان اولور.
داش اولور آسلان، اگر قهرایله قیلسا بیر نظر،
حکم قیلسا، دوشمنین قصدینه داش آسلان اولور.
زره ای مهر رخوندن تاپسا پرتو آسمان،
آسمان اوزره تامام انجم مه تابان اولور.
فیض لطف ایله اگر انسانی ائتسه تربیت،
قدرایله انسان ملک نسبت عظیم والشّان اولور.
ور ملک هم تاپسا عین التفاتیندان نظر،
عقل کامل کسب ائدیب، البته، بیر انسان اولور.
لطف و قهریندن تاپار مقبل عطا، مدبر جزا،
قطع و فصل حصر ایچون اول لحظه کیم، دیوان اولور.
کوثر جنّت اونون حکمونده دیر اول وجه ایله،
جمله نسلیندن همین آدم اونا مهمان اولور.
نوح اونون صندوقینه کشتی تک آپارمیشدیر پناه،
احتیاط ائیلر کی، ناگه بیر داخی طوفان اولور.
گرچی اسماعیله قربان گؤیدن ائنمیش قدر ایچون،
حق بیلیر، قدر ایچون اسماعیل اونا قربان اولور.
معجزی بیر گلشن پاکیزه دیر کیم ایسته سه،
عندلیب اول گلشنه داود خوش الحان اولور.
هر کیم اخلاص ایله خاک مرقدیندن زره ای
آلسا، اونونلا طبابت ائیله سه لقمان اولور.
دوستی گر معصیت قیلسا، اولور غُفران پذیر،
دشمنی مین طاعت ائتسه، موجب عصیان اولور.
سایۀ لطف و کرم گر سالسا خاک تیره یه،
جِرمِ خاک تیره رشک روضۀ رضوان اولور.
عقل کیم غواص دریای کمال علم دیر،
جوهر ذاتین تصور ائیله سه، حیران اولور.
فهم کیم، سیاح اقلیم دیار درک دیر،
وادی ادراکینی سیر ائتسه، سرگردان اولور.
دؤری اونون آل و اصحابیندن آلماز روزگار،
دؤر اونون دور، دؤور ایلن هر نئجه کیم، دؤوران اولور.
قصر وصفی نین بیناسین قیلسا معمار خرد،
عز و جاه و دولت و اقبال دؤرد ارکان اولور.
اول سپهر دولت و اقبال دن یوز دؤنده ریر،
دولت و اقبال هر کیمدن کی، روگردان اولور.
وار امیدیم فیض دولتدن، فضولی، کیم، مدام
تا دلیمده قوت نطق و تنیمده جان اولور،
دم اورام اوصاف اولاد علی دن نئته کیم،
مدح اولاد علی مستوجب غُفران اولور.