نه موشکول اولا جاهاندا کی، گردگار آچماز

شکسته کؤنلومو صوبح وصال یار آچماز،
نئچون کی، غنچۀ تصویری نوبهار آچماز.
منه دئدین کی، تسلی وئریر گول اول اوزدن،
یئری کی، کؤنلومو نیرنگ روزگار آچماز.
آچیلدی زر خس و خارین دیلی، فغان کی، هنوز،
بو بولبولون دیلینی جوش نوبهار آچماز.
قفسده بال و پریم واری سیندی جوهر تک،
نقابین اوزدن اول آیینۀ باهار آچماز.
غمینده شئشتره دوشدوم، عدم قاپیسینی هم،
منه مروت ائدیب چرخ بدقمار آچماز.
گؤیردی ریگ روان، نئیلییم، مگر یاره –
کی، دانه مین گرهین ابر نوباهار آچماز.
نه گون دور اول کی، سنین حسرتینده ابر باهار،
منه ترحوم ائدیب، چشم اشکبار آچماز.
وارا-وارا بدنیم گؤز-گؤز اولدو دام کیمی،
هنوز آیاغیمی زنجیر انتظار آچماز.
گؤزوم، هاچان آچیلیر آغزی بولبولون سنسیز –
کی، غنچه نین دیلینی جوش نوبهار آچماز.
گیره آچیلماز ایمیش بیر ال ایله، افغان کیم،
کؤنول دوگون لرینی چرخ آچارسا، یار آچماز.
رقیب چون گلیر اول کؤیی دن، عجب دیر کیم،
توتولموش اؤیله کیم، آغزینی ذولفقار آچماز.
زبانیم آچماق اوچون آچما ای رقیب آغزین –
کی، غنچه قفلینی نوک کلید خار آچماز.
بوگون منیم گؤزو کؤنلومدن آیری دؤور فلک،
نه قاپی اولا کی، لیل اؤرتمز و ناهار آچماز.
دئیین منیم پر و بالیم دن اؤزگه گولشنده،
نه غنچه دیر کی، خزان تؤکمز و باهار آچماز.
سؤزومو یار نه بیلسین کی، بو شکسته زبان،
اونونلا سؤز باشی هم آچسا، اول کی، وار آچماز.
قارینجا اؤز قَدَرینجه وورار، ییخار، داغیدار،
هامان منیم الیمی دؤور روزگار آچماز.
باخا-باخا قالارام شمع تک قیامتدک،
اگر منیم دیلیمی مروت ایله یار آچماز.
دؤنه-دؤنه منی ها، ای سپند یاندیردین،
مگر منیم دیلیم اول آتشین عذار آچماز.
اگرچی ناله ایله آچدی مین کؤنول قؤوسی،
فغان کی، نئی کیمی اؤز عقده سی کی، وار آچماز.
فغان کی، بیر گئجه ای ماه، شمع تک قؤوسی،
سنین جامالینا چشم اومیدوار آچماز.
کی، مونجا آچماز و آچماز فسانه دیر قؤوسی،
نه موشکول اولا جاهاندا کی، گردگار آچماز.