نه دن بو قؤوسی مهجور یانماسین گئجه لر

گونوم-گئجه م کیمی پیوسته قاره دیر سنسیز،
گؤزوم چیراغی، گؤزوم هیچ کاره دیر سنسیز.
جاهاندا رمل ایله گنج آختاران حریص کیمی،
منیم تامام ایشیم استیخاره دیر سنسیز.
سنینله هم بو ایمیش قیسمتیم، سانیردیم کیم،
منه نصیب دیل پاره-پاره دیر سنسیز.
عجب کی، مرهم کافور وصل ایلن بیتسین،
بو نؤوع کیم، جیگریم باشی یاره دیر سنسیز.
نه دن بو قؤوسی مهجور یانماسین گئجه‌لر –
کی، هر ستاره اونا بیر شراره دیر سنسیز.