گئنه لیلی، لیلی چؽخمیش سئیرانه

گئنه لیلی، لیلی چؽخمیش سئیرانه،
عاشقین آختاریر دیلین‌ده مجنون.
یانین‌دا بیر نئچه عشوه‌لی قؽزلار،
گزیر چؤل‌دن-چؤله، هامون به هامون.

هر زامان اوتورور بیر بولاق اۆسته،
قاباغین‌دا شراب، مزه‌سی پۆسته،
گۆل تک الده توتوب، گؤز دیکیب دوستا،
گۆنوزلو باده‌دن ساغری-مشحون.

درر، دسته باغلار یاخشی گۆللری،
دوداق آلت‌دان گۆلر شیرین دیللری،
افشان ائیلر هردم اۆزه تئللری،
حیران-حیران باخار دیده‌سی پرخون.

گاهی رقصه گلیب اوینار مستانه،
گاهی جوشه گلیب اولور دیوانه،
گاهی بۆلبول کیمی گلیر افغانه،
آغلار، آغلار، اوخور ابیاتی-موزون.

نباتی، ابسم اول، سؽغین مؤولایه،
قول اولوب عبثه دۆشمه صحرایه،
غوّاص تک غوته وور بیر بو دریایه،
جهد قؽل تاپاسان بیر دۆرری-مکنون.