گنجهدن گلیرم، یۆکوم اۆزومدو،
گنجهنین عسگری دۆزوم، دۆزومدو.
بیر عمیم قؽزی وار، ایکی گؤزومدو،
اؤزگهیه وئرمرم، من اؤزوم آللام،
شیرین قاداسینی جانیما ساللام!
آشیق شعریندن
گنجهدن گلیرم، یۆکوم خورمادی،
گنجهنین یوللاری بورما، بورمادی.
گنجهده بیر قؽز وار، تئلی دورنادی،
گۆنشه سن چؽخما، من چؽخیم دئییر!
گنجهدن گلیرم، یۆکوم چیچکدی،
گنجهنین گۆللری لچک-لچکدی.
گنجهده بیر قؽز وار، آدی چیچکدی،
قوشلارا سن اوچما، من اوچوم دئییر!
گنجهدن گلیرم، مالیم نه مالدی،
گنجهدن آلدیغیم ایپکدی، شالدی.
گنجهده بیر قؽز وار، آدی مارالدی،
جئیرانا سن قاچما، من قاچیم دئییر!
گنجهدن گلیرم، یۆکوم خؽنادی،
کؤنلوم دلی قوشو اونا قونادی.
گنجهده بیر قؽز وار، آدی سونادی،
سولارا سن آخما، من آخیم دئییر!
گنجهدن گلیرم، سؤزه بند اولوب،
گنجهنین مئیوهسی شکر، قند اولوب.
گنجهده بیر قؽزا گؤزوم بند اولوب،
جاوادا سن باخما، من باخیم دئییر!