قوربان اولدوغوم

بیر خئیلی زاماندیر گئتدی، گلمه‌دی،
عهدی پئیمانینا قوربان اولدوغوم!
ایسته‌دی جان وئردیم، قدیر بیلمه‌دی،
او شیرین جانینا قوربان اولدوغوم!
دئدیم: آیریلیغا یوخدور تاوانیم،
آیریلیب گئتمه‌سین سرو-روانیم!
بیر داها دؤنمزمی یوسما ترلانیم،
آدینا، سانینا قوربان اولدوغوم!
(او تمیز قانینا قوربان اولدوغوم!)
من هئی گؤیه باخدیم، گؤی منه باخدی،
گؤیلره باخماقدان گؤزلریم آخدی!
شیمشک اولدو، آنجاق بیر دفعه باخدی،
باخدی قوربانینا قوربان اولدوغوم!
کؤنول وئرمک ایستر بیر مۆژده یئنه،
سئوگیلی یوردومون گؤزللرینه‌!
شعریمه جان وئریب، گؤیلردن ائنه،
او حاق دیوانینا قوربان اولدوغوم!
او منیم شعریمین روحو، رواجی،
بۆتون گؤزللرین باشی‌نین تاجی!
بیلمزمی کی، اونسوز عؤمروم چوخ آجی،
شؤهرت و شانینا قوربان اولدوغوم!
گؤزللیکلر یاپما، دویغولار جانسیز،
منه طعن ائیله‌ییر هر یئتن قانسیز.
آتیلان اوخلاردان چؽخ گل زیانسیز،
نام و نیشانینا قوربان اولدوغوم!
بیر گئجه یاتمیشدیم غملی، مۆکدّر.
قلبیمی سؽخیردی سونسوز فیکیرلر.
بیردن گۆنش دوغدو، آچیلدی سحر،
باخدی گؤزلریمه او قومرال گؤزلر!
سسیمه اویاندیم، بومبوش بیر اوتاق،
داغلارین قارینا دؤنموشدو یاتاق.
عشقیمه، دویغوما یوخدو بیر اورتاق،
بو ایگی دۆنیادا ایختیلاط قاتاق!

باتوم، ۱۹۱۶