شۆکریه‌یم اۆچون

بیر گۆلسن، درمیشم گنجلیک باغیندان،
بیر گۆلو، چیچگی درمرم سنسیز!
کام آلدیم عؤمرومون اوغلان چاغیندان،
بیر باغا، باغچایا گیرمرم سنسیز!
سؤیله یادیندامی چاکوا، باتومی؟
اوولادین کؤنلومو، چالدین روحومو!
کامانا دؤنموشدو قلبیمین سیمی،
حورینی، ملگی گؤرمرم سنسیز!
نه چوخدور دۆنیادا قنیرسیز پری!
گؤزومه گؤروکمز داها هئچ بیری!
او قؽزیل ساچلاری، ایپک تئللری
ال آتیب بیرینی هؤرمرم سنسیز!
مندن خوشبخت وارمی دۆنیادا، دئیین؟
ای تئللی یاوروسو سلیمان بگین!
بختیم ترلان ایمیش: یئییندن، یئیین!
هئچ کسه بو بختی وئرمرم سنسیز!
سنینله گزرم ائلدن-ائله من،
باتارام، چؽخارام سئلدن-سئله من.
دۆشسم ده آغیزا، دیلدن-دیله من،
یاشایا بیلمرم بیر کرم سنسیز!
سوناتک گؤللرده اۆزسن ده منسیز،
قوش اولوب گؤیلرده سۆزسن ده منسیز؛
سن اصلی قالسان دا، دؤزسن ده منسیز،
آلیشیب یانارام من کرم سنسیز!
شۆکریه‌ه طالعیم، شۆکور خودایا!
گؤردوگوم دوغرومو، یوخسا پک رؤیا؟!
دولوب اۆرگیمه بو دادلی خۆلیا،
شیرین گۆنلریمی سۆرمرم سنسیز!
اَوت، بو سئودانین صفاسی چوخدور،
سئوداسیز حیاتین معناسی یوخدور!
گؤزلرین یؽلدیزدیر، کیرپیگین اوخدور،
اۆرک غوبار اولار – جان ورم سنسیز!..
شعریمین سؤزوسن، سؤزون – آهنگی!
اۆزونده برق وورور گۆللرین رنگی!
خیالین، جامالین گؤزل چلنگی!
ایلهام یئتیم قالار، عاغیل – کم سنسیز!

گنجه، ۱۹۱۷