گۆرجوستان

من عؤمرومون ان جانلی،
ان چؽلغین چاغلاریندا:
دولاشدیم گۆرجوستانین،
مامیرلی داغلاریندا.

سئیره چؽخدیم ایلک اوّل،
تیفلیسین یانلاریندا؛
دئدیلر کی: «دورما گل،
سورام اورمانلاریندا.

قادین بیر حؤکمودارین،
مازغاللی بیر بۆرجو وار؛
بو ایزسیز اورمانلارین،
هر یئرینده گۆرجو وار.

قارشیلار سنی قاتسو،
شن و گۆلش اۆزویله.
ایچرسن بیر ایچیم سو،
گۆرجولرین اؤزویله.

چؽخدیم من ده یوخاری،
باخاراق چؽلغین کۆره؛
چؽخدیم داغلارا ساری،
دوست اۆزلر گؤره-گؤره.

روحوم چیچکلر دردی،
نه حدی، نه حسابی؛
دادلی بیر نشئه وئردی،
کاخئتیانین شرابی.

آخشاملادیق بیر دفعه،
ریون چایی بویوندا؛
ایلندیم باخدیم کئفه،
گۆرجولرین تویوندا.

یاخشی یادیمدا قالمیش،
گاه آتلی، کا پیادا؛
اۆچ آی قدر، بۆتون قؽش
گزدیم مینقرئلیادا.

گؤرن بیلیر گۆرجوستان،
یوسونلو بیر دیاردیر؛
گۆرجوستانین جان آلان
گؤزللیکلری واردیر.

او زامان من گزرکن،
گۆرجوستان تورپاغیندا؛
قانلی بیر لکه گؤردوم
چارلیغین بایراغیندا.

سورونجا گۆرجولردن،
او سیرّین معناسینی،
آچدیلار منه بیردن،
مملکتین یاسینی.

ریون هایقیردی دوردو،
بئله اینسانلیق اولماز؛
اجل باختینی قوردو،
«آغلایان چوخ، گۆلن آز!»

آرادان کئچدی ایللر،
چارین سؤندو چؽراغی.
داریخ ائتدی دربه‌در،
او قانلی تمتاراغی.

او گۆنلر گؤردوم بیر ده
هماییللی تیفلیسی؛
ایندی باخدیم هر یئرده،
قایغیسیز یارین سسی.

ایندی آل بایراغیندا،
نه لکه، نه پاس واردیر؛
گۆرجوستان تورپاغیندا،
نه ماتم، نه یاس واردیر.

باخدیم همن گۆرچوستان،
ایندی چوخ باشقالاشمیش؛
دینججه آخان بیر سودان
ایلدیریملار چاخناشمیش.

قایالارین کوغوشونا
سؽغینمیش ایلدیریملار؛
داغلارین یوخوشونا،
دؽرماشان ایشیقلار وار...

اؤزوم گؤردوم زئماوچال،
ایشیق سالیر دؤرد یانا؛
اوغورلو باشقا بیر حال،
گلمیشدیر گۆرجوستانا.

«اینقیلاب و مدنیت» ژورنالی. ۱۹۲۹