جعفر خندانا

١
شاعیریم، خاطرین کوسمه سین مندن
دوستلوق آراسنیدا نزا کت اولور
راضییام، دئییلم، ناراضی سندن
نامردین قلبینده عداوت اولور
٢
من ده بیر شاعیرم، تانییر عالم
آزاددیر مطبوعات، آزاددیر قلم
حیاتدان یازماغا عاجیز دئییلم
شاعیرچین هر یولدا مهارت اولور
٣
شعرلر یازارکن اوخوردوم سنه
هر نه گناهیم وار، سندندیر یئنه
دئسئیدین سهویمی ازلدن منه
عارفه بیر کلمه کفایت اولور
۴
من نئجه آیریلیم رعنا غزلدن
عشوه لی دلبردن، نازلی گؤزلدن؟
انسان کی بیر شئیه اوُیدو ازلدن
اؤلونجه باشیندا او عادت اولور
۵
محو اولسون دونیاده خلقین دوشمنی
من ده چوخ سئویرم عزیز وطنی
وطنین قدرینی بیلمه ین دنی
اؤزو خلق ایچینده خجالت اولور
۶
ائلیمین ظفری، غالبیتی
هر ایشده مردلیگی، فعالیتی
قویموشدور حئیرتده بشریتی
چوخ چکمز اؤلکه میز بیر جنّت اولور
٧
منه غزلچی لیک، سانما کی، عاردیر
منیم وطنیم تک سئوگیلیم واردیر
منه الهام وئرن بو شن دیاردیر
وطندن شاعیره سعادت اولور
٨
عین حقیقتدی، سؤزوم لاف دئییل
واحدم، مقصدیم خلاف دئییل
اللی بیر یاشیمدا بو انصاف دئییل
هر یئردن اوستومه مذّمت اولور