سنسیز!

سیّار:
((گؤز مردمی کی، اشک توکر بیر گیله سنسیز
بیر طفل دیر آغلار منه ائیلر گیله سنسیز))
واحد:
بیلمه م یئنه چشمین نه خطا ائیله‌میش ای بوت؟!
مین فتنه دوشوب مملکتِ بابیله سنسیز
بدری:
((بیر گوشهٔ چشمیله دؤنوب باخمارام، ای گول
دونیایا گؤزللر گله مین قافیله، سنسیز))
واحد:
زؤرق کیمی امواجِ غم ایچره ائله غرقم
طوفاندا چیخارماز منی بیر ساحیله سنسیز
بدری:
((یوز دفعه ا گر شمع روخونله دلِ عاشیق
پروانه کیمی یانسادا گلمز دیله سنسیز))
واحد:
شوریله گؤروب ناله می عشقینده مغنّی
ترک ائتدی ((نوا)) پرده سینی ((زابیله)) سنسیز
تا گورمه سم اول مصحفِ روخسارینی بیرده
مین جانیم اولا وئرمرم عزرائیله سنسیز
ای لاله روخوم کؤنلونه حیرانم ازلدن
دؤزموش نئجه هیجرانینا مین داغ ایله سنسیز
واحد! نه دئمیشلر یئنه ((سیّار)) ایله ((بدری))
بیر بیلمه‌دیم اول دلبرِ شیرین دیله سنسیز؟(١)

١سیّار و بدری واحدین حیاتینین اوللرینده کی چاغداشلاری .