قیامتدی دلبریم!

بیلمم، نه اولدو، قویدو منی، گئتدی دلبریم؟
آغلار گؤز ایله عاشیقی ترک ائتدی دلبریم
یوز ایل ده عؤمر قیلسام، اونو من اوُنوتمازام
گولزارِ وصلینه منی اؤیرتدی دلبریم
اونسوز بو غربت اؤلکده جهنم گچیر منه
سانکی بو خسته کؤنلومه جنتدی دلبریم
سئودالی کؤنلومو نئجه بس ساکیت ائیله ییم
بیمارِ عشقه اصلی شفاعتدی دلبریم
بیر استفاده ائتمه ین، ای قان اولان کؤنول
راهِ وصاله یئتمگه فرصتدی دلبریم
عالم، وفاسی اولمایانا نفرت ائیله ییر
سن گل وفاسیز اولما، پیس عادتدی دلبریم
وار بیر اومید، بیرده، گؤره م گول جمالینی
آخیر وفالی عاشیقه قسمتدی دلبریم
واحد، قانیم قارالدی دوشرکن خیالیما
بیر آیری نازنیندی، قیامتدی دلبریم