منو
گؤزلرین
سئوگیلیم! ائل بیلیر من اهل دردم
سندن باشقاسینی سئوسم نامردم
غصه دن اؤلوره م نئیلیم کی، هردم
منی قویوب باخیر یانا گؤزلرین
کپریگین خنجردیر، قاشلارین کمان
ییخدیغین عاجیزه وئرمزسن آمان
دئدیلر جلادسان، ائتمه زدیم گمان
سالاجاقدیر منی قانا گؤزلرین
سنین الینده دیر هر اختیاریم
ظالیم، اؤلدور منی، غمدن قورتاریم
بس کیمه سؤیله ییم، کیمه یالواریم
گتیریبدیر منی جانا گؤزلرین
کؤنلومو سالاجاق زولفون کمنده
حسرتین قویماییب جان قالسین منده
او گؤزلر واریکن نه قدر سنده
آلاجاق کؤنلومو سونا گؤزلرین
واحدم، سئوگیلیم، من ده قانیرام
فتنه کار گؤزلی اوزدن تانیرام
نئجه دئییم سنه، غمدن یانیرام
منیم تک اود توتوب یانا گؤزلرین