سای بیر طرفدن

سئوگیلیم قاشلارین چاتیب باش – باشا
حُسنونه ائتمگه هر گون تماشا
اوفوقلردن چیخیر هر سحر قوشا
گونش بیر طرفدن، آی بیر طرفدن
چوخداندیر کسمیسن مندن نظرین
یانیرام عشقینه،یوخدور خبرین
چکیبدی قصدیمه جلاد گؤزلرین
کامان بیر طرفدن، یای بیر طرفدن
سن یئری، آرخانجا زولفون سورونسون
سونبوللر آل یاشیل دونا بورونسون
گونش جمالین آچ، آشکار گؤرونسون
باهار بیر طرفدن، یای بیر طرفدن
حسرتین یاندیریر پروانه لری
قویما کنارینه بیگانه لری(١)
آچما زولفونده کی دیوانه لری
باغلا بیر طرفدن، سای بیر طرفدن
اوخونسون ائلیمین ظفر نغمه سی
واحدین غزلی، ((خان ))(٢)نین خوش سسی
ینه ده بزه سین بیزیم مجلیسی
شربت بیر طرفدن، چای بیر طرفدن

١مصرع بو شکلیده ده قئید اولموشدور:
قویما یاخینینا بیگانه لری
٢شوشالی خواننده.