منو
شاعیرانه گؤزلری وار!
بو دلبرین نه گؤزل، عاشیقانه گؤزلری وار
نه یاخشی جان آلیجی، محرمانه گؤزلری وار
بوتون گؤزللر ایچینده بو نازنین گؤزلین
گؤزلیگیندن علاوه، یگانه گؤزلری وار
بو دلربا گؤزلین قان تؤ کوب، جان آلماقدا
غریبه جاذبه لی ماهیرانه گؤزلری وار
باخاندا، ای کؤنول، اول شوخا احتیاط ایله باخ
ساقین کی، جان آلیجی، دلبرانه گؤزلری وار
گؤره نده عاشیقی مین نازایله اشاره ائدیر
عومومی جذب ائله ین عارفانه گؤزلری وار
بیر اؤزگه دلبره، واحد، دئییلمه‌میش بوقدر
بو آفتین نه گؤزل، شاعیرانه گؤزلری وار