منو
صفاسی یوخدور اونون!
کؤنول، اینانما او شوخه،وفاسی یوخدور اونون
حقیقی محرم اولان آشناسی یوخدور اونون
منیم ترانه مه بولبول چمنده حسرتدیر
منیم تک عشقده شور و نواسی یوخدور اونون
من ایندی کی وارام عالمده، اؤلمهییب مجنون
او یوخسادا، دئمه یین، اقرباسی یوخدور اونون
فلکدن اوُمماق عبثدیر، اومیدِ ذؤقِ حیات
بیناسی غصه و غم دیر، صفاسی یوخدور اونون
طبیعت عاشیقی دیر، اؤز یاراتدیغی گؤزلین
شعور سوزدور ازلدن، ذکاسی یوخدور اونون
اسیرِ زولفِ نیگار اولمایان دئییل عاشیق
باشیندا عشق و محبت هاواسی یوخدور اونون
بوتون گؤزللره دیر واحدین بیل اخلاصی
گؤزلدن اؤزگه شئیه اختصاصی یوخدور اونون