آللاه رضاسینا!

سالیبدیر، دلبرا، زولفون اوزونده سایه هر یانه
گؤرونمور تاقِ ابرولر، دوشوبدور بس کی پنهانه
اؤزون، ماهِ منوّرسن، سنه یوخدور زاوال، ای شوخ
گؤره رویون ا گر ترسا، گلیر دین ایله ایمانه
منی مجنون ائدیب عشقین، سالیب صحرایه سرگردان
اولوب آباد اولان کؤنلوم سنین عشقینله ویرانه
منه رحم ائیله، ای مه رو، منیم نازلی نیگاریمسان
منی، آللاه رضاسینا، بو قدری سالما هیجرا نه
فراق حسرتین چکمکده، بالله، زار و گریانم
سنین بیل، راه عشقیندیر، منی سالمیش بیابانه
تنور عشقده عشاقلارین کؤنلون کباب ائتمه
ترحم قیلماسان، آهیم سالار دونیانی طوفانه
تمنا بسدیر، ای واحد، بو قدری ائتمه دلبردن
گلیر انصافه مه رولر، سنی سالمازلار افغانه