تر قطره سی شبنم کیمی دیر

سانما، کؤنلوم بو چمنزاردا خرّم کیمی دیر
یارسیز عاشیقه جنّت ده جهنم کیمی دیر
آچیلیر، زولفون آچیلدیقجا، توتولمش کؤنلوم
زولفونو گؤرمه دیگیم گون منه ماتم کیمی دیر
ییخدی مین عاشیقِ بیچاره نی، بیر غمزه ن اوخو
مرحبا گؤزلرینین شستینه، رستم کیمی دیر
اؤزونو قاشلارینین طاقینه بنزه تمک اوچون
گور، هلالی فلکین ایندییه جن خم کیمی دیر(١)
گؤزلیم، لاله یاناغیندا کی تر قطره لرین
تازه گول یارپاغی اوستنده کی شبنم کیمی دیر
بیر فقیر عاشیق ا گر سئوگیلی جانانی ایله
توتا مئی جامینی الده، او ائله جم کیمی دیر
دلبریم همدم اولوب غیرایله، واحد، نه غمیم!
غمِ عشقی منه هیجران گونو همدم کیمی دیر

١مصرع بو شکلیده ده قئید اولموشدور:
یئنی، آیی فلکین ایندییه جن خم کیمی دیر