وار حؤرمتیمیز!

حقیقی اولسا ایدی، سئوگیلیم، محبتیمیز
سئؤینج ایله یاشاردی بیزی حقیقتیمیز
سبب نه اولدو، دئییرلر، او گولدن اینجیمیسن
سبب بودورکی، موافق دئییل طبیعتیمیز
گرک دئییل بیزه جنّت، نه جنّت حوریلری
وطن گؤزللری حوری، وطن ده جنّتیمیز
وطن محبّتی اولمازسا، محو اولوب گئده ریک
وطنله دایم اولور عشق و ذؤقه رغبتیمیز
اول آهو گوزلو هله دوشمه ییر کمنده یاخین
نئچین کی، بیزدن اونو هورکودور قیامتیمیز
وطن گؤزللری آرتدیقجا خالقیمیز سئوینیر
وار ایندی اؤز گولوموز، اؤزگه دن نه مینتیمیز؟
مرادا یئتدی رقیب، ای فلک، خراب اولاسان!
نه واختادک قالاجاق کؤنلوموزده حسرتیمیز؟
نصیحت ائتدسه کئچمیش کیلر، دوشونمه‌میشیک
بیزیم ده ائتمیر اثر هئچ کسه نصیحتیمیز
بو سئوگیدن گرک ایندی بیر استفاده ائدک
جاوان ایکن نه قدر الده واردی فرصتیمیز
اگر اجازه نیز اولسا، وصاله تئز یئته ریک
بو ایشده طالعیمیز وار، گر اولسا قسمتیمیز
بیز عاشیقیک، گرک عشق عالمینده ناله ائدک
نئچن کی، روز ازلدن بو اولدو قسمتیمیز
گؤره نده واحدی،درد اهلی دیر، چون اینجیتمه
بیزیم ده وار اونا، ای گول، بیر آزجا حؤرمتیمیز