بیزده دیر

حیات باخچاسینین باغبانی بیزیک
یاپراقلی سؤز آچان گوللر بیزده دیر
بیزدن الهام آلیر شیدا بولبوللر
نغمه یه جان وئرن دیللر بیزده دیر!
شاعیریم! اینجه سؤز اوستادی بیزیک
بؤیوک ((واقف))(١) لرین اؤولادی بیزیک
صنعت دونیاسینین فرهادی بیزیک
داغلارا سس سالان ائللر بیزده دیر
دره لردن آخان گوموش بولاغلار
گؤ یلره باش چکن دومانلی داغلار
سونبوللر، تارلالار، چیچکلی باغلار
آل الوان گئینمیش چوللر بیزده دیر
عطیرلی باغلارین سارماشیقی ییک
ائلین بزه گی ییک یاراشیقی ییک
ائلدن تؤره نمیشیک، ائل عاشیقی ییک
اوجا بویلار. نازیک بئللر بیزده دیر
انسان سئوه رمی هئچ روحسوز گؤزلی؟
شاعیرین اولماز شعری، غزلی
عاشقین اولارمی سٔوزو مزه لی؟
سازی دیللندیرن تئللر بیزده دیر
دونیامیز نشئه یله کئفله دولودور
بیز گئدن دوغرو یول، حقین یولودور
قولوموز ائللرین پولاد قولودور
قوه تدن دوشمه ین ائللر بیزده دیر
واحدم، غصّه دن غمدن آزادم
خلقیمین دوستویام، یادلارا یادام
بزه کلی اؤلکه مه باخدیقجا شادام
یاشیل باش سونالی گوللر بیزده در

١شاعیر واقف.