عارفه بیر کلمه سؤز کفایتدیر

حیاتا ذؤق وئرن سئوگیدیر، محبتدیر
محبت هر کس اوچون ان بؤیوک سعادتدیر!
نه مجلیسین اولور اولسون، عمومه خدمت ائله
عمومه خدمت اؤزو باشقا بیر شرافتدیر!
بو بساطِ مئیده اؤزون دوز آپارمایان کیمسه
نصیحت ایله دوزه لمز، گدا، طبیعتدیر!
بیر آزجا نشئه لنیب ازمه روحون اؤزگه لرین
اوُتان بو توتوغون ایشدن، بوکی، قباحتدیر!
محیطِ مجلیسی، سئیر ائت، ادبله باده نی ایچ
نه گلدی آغزینا، صرف ائیله مک پیس عادتدیر!
کی، یوخسا پول دا گئده، حؤرمتین ده مجلیسده
بو مستلیک، بله عشرت گؤرک نه حاجتدیر؟
نه تارا فیکیر وئریرسن، نه ده غزلخوانا
یا شعر دیر بو و یا نغمه دن عبارتدیر؟
قدح الینده گول اول، بولبول اول، گؤره ن کسلر
دالینجا سؤیله مه سینلر: نه بی لیاقتدیر!
بیلرمی، جاهیله یوز دفعه سؤیله سن، واحد
و لا کن عارفه بیر کلمه سؤز کفایتدیر؟