منو
جانیمی قوربان ائیله دیم!
خاطیریم زولفون خیالیله پریشان ائیله‌دیم
اؤز الیمله کؤنلومون مولکونو ویران ائیله‌دیم
گؤل اوزونده دانهٔ خالین گؤروب، ای غنچه لب
عندلیبِ گولشنین اولدوم دا دل قان ائیله‌دیم
شمعِ روخسارین گؤروب پروانه لر، ای مه لقا
اودا یاخدیم جانیمی، اول شمعه سوزان ائیله‌دیم
قصد جانیم چون نظام ایله دوروب مشگانلارین
سینهٔ سوزانیم اول پیکانه قالخان ائیله‌دیم
قصدی بویموش، خنجرِ ابرولرین قانیم تؤ که
من اونا اوندان قاباق جانیمی قوربان ائیله‌دیم
دون رقیب ایله گؤروب جانانی اول قدر آغلادیم
بحرِ اشکِ چشم ایله اغیاری حئیران ائیله‌دیم
واحدا، مجنونو دئرلر، عاشیقِ صادق، ولی
من مجنوندان فزون عشقیمده طغیان ائیله‌دیم