منو
تلسمه
صبر ائیله کؤنول، محنتِ هیجرانه، تلسمه
درد اهلی یئتر صبرله درمانه، تلسمه
کام آلمایاجاق آیریلیغا باعث اولانلار
عاشیق یئته جک سئوگیلی جانانه، تلسمه
کیم اولسا سبب آیریلیغا، عؤمرو گؤده لسین
بیر گون اولاریق یارایله همخانه، تلسمه
یوسیف ده زولیخانی محبتله سئویردی
سالدیردی زولیخا اونو زندانه، تلسمه
دونیایه وفا ائیله‌مه، چوخ آغلاما، کؤنلوم
دونیا نه وفا قیلدی سلیمانه، تلسمه
پروانه ا گر یانسادا شمعین ستمیندن
شمعین ده یاخار عؤمرونو پروانه، تلسمه
زاهید چالیشر ییخماغا میخانه بیناسین
مسجید قالاجاق، عکسینه، ویرانه، تلسمه
گول ذؤقونو چکمک ابدی خاره ده قالماز
بولبول گلر، البته، گولوستانه، تلسمه
گوندن گونه آرتیر بو گؤزل حوری لقالر
دونیا دؤنه جک جنّت و رضوانه، تلسمه
واحد، ایچه جکسن، دئمه کی، تؤبه‌لر اولسون
جلب ائیلر آخر سنی میخانه، تلسمه