شانه نئیله سین؟

زولفون داغیلماق عادتیدر، شانه نئیله سین؟
یارین وفاسی اولماسا، بیگانه نئیله سین؟
پروانه عشقی وار، دولانیر شمع باشینا
شمع ایسه یاندیریر اونو، پروانه نئیله سین؟
زولفونده ناله ائیله سه اینجیتمه کؤنلومو
زنجیره تاب قیلماسا، دیوانه نئیله سین؟
معشوقون اؤزگه لرله گزیر، اوُمما خلق دن
بیر ائوکی گئتدی غارته، هم خانه نئیله سین؟
گول غنچه لیقدان، عادت ائدیب بی وفالیغی
دؤنموشسه بولبولون اورگی قانا نئیله سین؟
ییخدی رقیب کؤنلوم ائوین، وصلِ یار ایچون
دشمن منم، بو ظالیمه کاشانه نئیله سین؟
میخانه نین شرافتینی آنلا، باده ایچ
سرخوشلیق ائیله دین، بونا میخانه نئیله سین؟
سیندیر طبیعتینده اولان جهل شیشه سین
سیندرما مست اولان کیمی پیمانه نئیله سین؟
واحد، دئییرسه خلقه حکیمانه باده ایچ
همدم فساد اولاندا، حکیمانه نئیله سین؟