آباد ائله سن ده

ناراضیام، ای گول، منه امداد ائله سن ده
ناشاد ائله ین کؤنلومو دلشاد ائله سن ده
اؤز سهوینه بیر واخت پئشیمان اولاجاقسان
اولماز یئتیشن دادینا، مین داد ائله سن ده
سیندیرمیسان، ال وورما سینیق کؤنلومه، ظالیم
ویرانه دوزه لمز، نئجه آباد ائله سن ده
وصلین هوسی ایندی باشیمدان نئجه چیخسین
زولفونده اسیرم، ا گر آزاد ائله سن ده
اؤز یارینا باخ، باشقا گؤزللر منی سئومز
بولبول کیمی یوز ناله و فریاد ائله سن ده
آلداتما منی، بیرده اینانماز سنه کؤنلوم
بوندان بئله مین معجزه ایجاد ائله سن ده
اغیاره اوُیوب، واحده یادلارکیمی باخما
یاددان او چیخارماز، سن اونو یاد ائله سن ده