گونش دئییم؟

نه دن یاراشمادیم، ای یارِ ماه پاره، سنه
کی، بلکه، خلوتی اغیار ائدیب اشاره سنه؟
او گول جمالینی، بیلمم، نه اوزله وصف ائله ییم
گونش دئییم، گؤزلیم، یا دئییم ستاره سنه؟!
سنین گؤزلیگینین من ده چوخدان عاشیقیم
نه خلوتی دئمک اولمور، نه آشکاره سنه
کمندِ عشقدن، البته کی، خیلاص اولماز
بو زولف ایله وورولا هانسی بختی قاره سنه
جوانلیق عالمی دیر، ایندی دل وئرن چوخ اولار
اینانما، ائیله یه مشکل گونونده چاره سنه
رقیبدن اؤزونو گؤزله، شأنین ا کسیتمه
کناردن ائله یر غئیرلر نظاره سنه
او گون دئدیم سنه، واحددن ال گؤتور، افسوس
همین سؤز دئییرم ایندی من دوباره سنه