منو
حُسنووه مغرور اولدون!
نه اوچون حُسنووه، ای گول، بئله مغرور اولدون!
بیوفالیقدا بوتون عالمه مشهور اولدون
نییه اؤز عاشیقینی بونجا نظردن سالدین
کیملر اؤیرتدی سنی، یا نییه مجبور اولدون؟
بسله‌دیم زحمت ایله غنچه زامانیندا سنی
نییه گول تک آچیلیب، غئیر ایله مسرور اولدون؟
توتدون اغیاری، منی هیجر اودونا یاندریدین
سنه بیگانه اولان کسلر ایله جور اولدون
اؤزگه‌لر مجلیسینی گون تک ایشیقلاندیردین
بیزه یئتدیکده نه تئزکن بئله بی نور اولدون؟
وئردین اغیاره نشان جمله گؤزه للیکلریوی
پردهٔ زولفله گؤرجک بیزی مستور اولدون
سن هله، واحد، ((عن الحق)) سؤزونو ورد ائیله
بیر سوران اولمادی سندن، نییه منصور اولدون؟