چاره سی وار!

نه درد اولورسا، غلط دیر، دییلله چاره سی وار
علاجی اولماز او شخصین کی، دلده یاره سی وار
فغان و ناله می، ای مه، یئتیرمه افلاکه!
کی، یاندیرار سنی بو آتشین، شراره سی وار
فغانِ عاشیقی، ای گول، دوشونمه بیهوده
کی، عشق گولشه نینین، من کیمی هزاره سی وار
بو قدر گل منی آغلاتما، رحم قیل، جانا
گئجه ـ گونوز گؤزومون قانلی بیر فواره سی وار
بو نوعی قانیمی تؤ کمزدی تیرِ مشگانین
بو ایشده قاشلارینین، چوخ گمان، اشاره سی وار
منوّر ائیله ین آفاقی آهیم، آتشی دیر
بو چرخ کج رویشین، سانما کیم، ستاره سی وار
بو عشق بحرینه، واحد، او نوع غرقم کی
نه بیر نیجاتا اومیدیم، نه بیر کناره سی وار