ایندی دئییر

نه دردی واردی کؤنول، نازلی یارا ایندی دئییر
دئمزدی سیرّین او گولعذارا، ایندی دئییر
چمنده اینجمه یین بولبولون فغانیندان
گولوندن هر نه چکیب، نو باهارا ایندی دئییر
وفاسیز اولدوغونو من دئمیشدیم اول شوخون
او واخت من دئیه نی ائل دوبارا ایندی دئییر
او مه لقانین ازلدن اسیرِ زولفو منم
منه رقیبلریم بختی قارا ایندی دئییر
دئییم کی، جؤر ائله مه، قورخورام، دئسین عالم
بو بینوا غمینی ظلمکارا ایندی دئییر
((آز ایچ)) دئدی، دردیمی طبیبه دئدیم
شراب ایمیش، دئمه، هر درده چاره، ایندی دئییر
گمان کی، چوخدان او شوخون اسیریدیر واحد
چیخارتماییب هله ده آشکارا، ایندی دئییر