آیسان، یا ستاره سن!

ناز اتئمه،سئوگیلیم، بیلیریک، ماهِ پاره سن
عشق اهلینی کمنده سالان زولفو قاره سن
آچدیقجا گول جمالینی عالم ایشیقلانیر
آیسان، گونش میسن، گؤزلیم،یا ستاره سن؟
بیر کیمسه گؤرمه دیم، ستمیندن خیلاص اولا
کیمسن، دوشونمورم، نه چیسن، سن نه کاره سن
یوزلرجه نازنین لراولور مبتلا سنه
گئتسن بو ناز وغمزه ایله هر دیاره سن
گوللر آیاغین اؤپمه گینین حسرتین چکیر
چیخسان بو سرو قامتیله لاله زاره سن
چشم و لبین خیالی منی قیلدی مئی پرست
سالدین همیشه کؤنلومو رنجِ خوماره سن
نقصان یئتیشمه سین، گؤزلیم، ماهِ رویونا
چیخما رقیبله کئجه منسیز کناره سن
بیردفعه غئیریله سنی گؤردوم بلادایام
درد اؤلدورر منی، یئنه گزسن دوباره سن
خاکِ مزارِ واحده بیر لاله زار اولور
قویسان ا گر اونو اؤز الینله مزاره سن