عاشیقین پناهی نه دیر؟

او جان آلان نه بیلیر، عاشیقین پناهی نه دیر؟
اونا بو حُسن وئرن قدرتِ ایلاهی نه دیر؟
صفاسین اؤزگه گؤرور، من بلالارین چکیرم
منیم بو قانا دؤنن کؤنلومون گناهی نه دیر؟
داغیتدی زولفون اوزه دلبریم، کئچنده دئدیم:
بونون یانیندا بهشتین گول و گیاهی نه دیر؟
بو قارا گؤزلولرین اولمایینجا مجنونو
جهاندا کیم بیله جک عشق بارگاهی نه دیر؟
گئجه گوندوز ائدیرم آه و ناله کویوندا
سوروشماییر، بو قدر بیر فقیرین آهی نه دیر؟
گول اوزلو، نازلی گؤزللرمیش، ایندی من بیلیرم
محبت اهلینین عالمده قیبله گاهی نه دیر؟
تاریندا، واحد، ا گر قوربانین(١) محارتی وار
دایان بیر ایندی گؤره ک، زولفونون(٢) ((دستگاه))ی نه دیر؟

١تار اوستاسی، قوربان. ٢خواننده، زولفی.