روزگاریم اوندا ایدی!

او بیوفا منیم ایستکلی یاریم اوندا ایدی
اسیری بیر من ایدیم، اختیاریم اوندا ایدی
رقیب لر یوخ ایدی، من اسیرِ عشقی ایدیم
بو رتبه ایله اعتباریم اوندا ایدی
گولردی گول کیمی، من آغلادیقجا بولبول تک
خزان غمین نه بیلیردیم، باهاریم اوندا ایدی
باخان زاماندا منی اؤلدوروب دیریلدردی
منیم او عشق ایلاهیسی تانریم اوندا ایدی
منی قویوب، گئدیب ایندی رقیب لرله گزیر
یاخیندی اوندا منه، جمله واریم اوندا ایدی؟
هانی او دم کی، نیگاریم منیمله همدم ایدی
دمم او دملرایدی، روزگاریم اوندا ایدی!
منیم ده، واحد، اولوب عشقه دوشدوگوم گونلر
او بیوفا منیم ایستکلی یاریم اوندا ایدی