ایگیتلر مرد اولور!(١)

وفاسیزدیر، کؤنول، هرکیم اسیر گرجانی جاناندان
گرک جانان یولیندا گئچسین عاشیق شؤقله جاندان!
منیم جانان خیالی خاطریمدن چیخماز اؤلسه م ده
اوُنوتماز اؤز گولون، بولبول، جدا دوشسه گولوستاندان
برابردیر محبت عالمینده لیلی مجنونلا
نه مجنون لیلی دن دؤنمز، نه لیلی آیریلار اوندان
منیم ده سئوگیلیم گؤزلر منی، هیجرانه صبر ائیلر
اومیدِ وصل ائدن عاشیق داریخماز دردِ هیجراندان
گره کدیر بولبولون گول ده جفاسین چکسین عشق ایچره
نه اوغلان قیزدان آرتیقدر، نه قیز اسگیکدیر اوغلاندان
یوز ایل غربته جان وئرسم، یئنه مجنون اولان کؤنلوم
وفادن ال گؤتورمز، دونمز اول زلفِ پریشاندان
مزارم داشینا ائللر منی نامرد یازسینلار
وطن اوغروندا من کام آلماسام مردلیکله دوشماندان(٢)
اگر مین جانیم اولسا، بیر وفالی یاره قورباندیر
ایگیدلر مرد اولور، نامرد قورخار بیر آووج قاندان
گیدیب جانانیما، واحد، خبر وئر: اؤلدی خاین لر!
اؤزوم ده ساغ سلامت چیخمیشام بو قانلی مئیداندان

١جبهه ده بیر عسکرین خواهیشی ایله یازیلمیشدیر.
٢بیت بو شکلیده ده قئید اولموشدور:
مزارم داشیناائللر منی نامرد دئیب یازسین
وطن اوغروندا گر کام آلماسام مردلیکله دوشماندان