اولمایاجاق

وفالی اولماسان، ای گول، باهارین اولمایاجاق
چمن بهشت اولا، خوش روزگارین اولمایاجاق!
گؤزللیگینده گؤزلسن، حئیف، بیر عیبین وار
کیم ایله عؤمر ائله سن، اعتبارین اولمایاجاق!
او قاره گؤزلرینین حسرتین چکن کؤنلوم
اومید وصلین ایله انتظارین اولمایاجاق!
اسیرِ زولفون اولانلار قورتاردی ظلموندن
جفالار ائیله مکه اختیارین اولمایاجاق!
گؤزللیگ عالمینین پادشاهی اولسان دا
فقیره جؤر ائله مک اقتدارین اولمایاجاق!
بلای عشقه هله دوشمهییب، سلامتسن
بو درده دوشمگه صبر و قرارین اولمایاجاق!
وفالی یار سنه اؤز ازلکی یارین ایدی
دوباره ایسته دیگین یار، یارین اولمایاجاق!
سنینده، واحد، حیاتیندا شعردن باشقا
وطن اوغوللارینا یادگارین اولمایاجاق!