مرحمتِ حق وار!

یار اوچون نازینی چکمگ گرک اغیارلارین
گول اوچون بولبوله مین جؤرو یئتر خارلارین
منی آلودهٔ مئی گوزلری آهولار ائدیب
قُورتاران وارمی الیندن بو خطاکارلارین؟
یار ایدی، ساقی ایدی، جامِ مئی الده من ایدیم
سان فلک توپلامیش اوز ثابت وسیّارلارین
مست لیک قصدی ایله زهد و ورع دن قاچیرام
کی، گؤزوم گؤرمه یه کارین بو ریا کارلارین
بیزی اوستادیمیز آذر(١)، دئمه، تنقید ائتمیش
دگمه‌میش پیرِ موغان قلبینه مئی خوارلارین
بیز گناکارلاریق، مرحمتِ حاق دا کی وار
کئجه جک جؤرمونو، البته گناهکارلارین
بیزی بیر جام ایله مئی نشئه سی ییخمیشسا، نه غم
ائوی آباد اولا آذر کیمی غمخوارلارین
ا گر اوستادیمیز آذر کیمی بیر همدم اولا
همدمی اولماز ایدیم بیر پارا عیارلارین
هانی یوسیف(٢)، هانی ثابت(٣)، هانی ثاقب(۴) کیمی دوست
کی آیاغین اؤپوم اول یار، وفادارلارین
دردِ مئی قالسادا، غم چکمه آیاق آلتیندا
چیخاجاق باشینا ان رتبه لی سردارلارین
واحدم، مست گؤره رکن، منه چوخ عیب ائتمه
طعنه سیندن ایچیرم بعضی دل آزارلارین

۴،٣،٢،١٠٢ینجی عصرین اوللرینده باکی شاعیرلری.